விமர்சகர்கள் 'தனத்'தை மட்டையடியாக விமர்சித்தாலும், சங்கீதாவுக்கு என்னவோ பாராட்டுகளுக்கு குறைவில்லை. சென்னை கமலா திரையரங்கில் நடந்த, 'தனம்' படத்தில் பணியாற்றிய கலைஞர்களுக்கு நடந்த பாராட்டு விழாவில் இதனை கண்கூடாக காண முடிந்தது.
படத்தின் ஹீரோ பிரேம், ஒளிப்பதிவாளர் சீனிவாஸ் தேவாம்சம், தயாரிப்பாளர் முத்தையா தேவர் மற்றும் பெப்சி விஜயன், எஸ்.பி.முத்துராமன் உள்ளிட்டோர் கலந்து கொண்டனர். விழாவிற்கு கமலா திரையரங்கு உரிமையாளர் வி.என். சிதம்பரம் தலைமை தாங்க, அவரது மகன் வள்ளியப்பன் கலைஞர்களுக்கு பரிசுகளை வழங்கினார்.
விழாவில் பேசிய அனைவரும் தவறாமல் குறிப்பிட்டது சங்கீதாவின் நடிப்பு மற்றும் அவரது துணிச்சல். இன்றைய நடிகைகளுக்கு திறமையே இல்லை என்று குற்றம்சாட்டுகிறவர்களுக்கு மத்தியில் வித்தியாசமாக அமைந்தது எஸ்.பி.முத்துராமனின் பேச்சு.
இன்றைய நடிகைகளிடம் நிறைய திறமை இருக்கிறது. அதை வெளிக் கொண்டு வரும் பொறுப்பு இயக்குனர்களுடையது. சினிமாவில் நடிகைகளை கவர்ச்சியாக மட்டுமே பயன்படுத்துகிறார்கள் என்று குறை சொல்கிறவர்கள், 'தனம்' போன்ற படத்தை பாராட்டி கௌரவிக்க வேண்டும் என்றார். விழாவில் ஏனோ சங்கீதா கலந்து கொள்ளவில்லை.
|
